威士忌知多啲：威士忌點解要入木桶？

成日聽人講威士忌要放入木桶熟成，究竟係一回咩事呢？佢其實係威士忌製作過程中好重要嘅一環，係木桶裏面熟成，會影響到威士忌最終嘅味道同顏色。咁點解要用木桶呢？其實人類係十五世紀開始就用木桶裝酒，方便大量運送，而最早有記載木桶對烈酒熟成影響嘅文字係1818年。當時英國同美國嘅威士忌市場好旺，蒸餾廠需要大量木桶，所以就用埋其他酒類嘅木桶，發現威士忌會有唔同嘅味道。

威士忌橡木桶

橡木係最常用嘅木桶材料，因為佢數量多同易搵，仲符合威士忌熟成嘅需求。常用嘅有美洲白橡木、歐洲橡木同日本水楢木。美洲白橡木用得最多，而歐洲橡木紋理較密，酒體吸收香氣多啲，通常會先裝雪莉酒再用來熟成威士忌。日本水楢木就含有大量香草醛，紋理深且多孔隙，容易滲透。

填裝木桶就好似去加油站咁，只係用填充槍將酒注入木桶，速度快。木桶填滿後，要栓上木塞，再用槌子槌緊。威士忌入桶熟成頭幾年，木桶會賦予酒色，原本透明無色嘅酒體會變得有色彩，從淺黃到深褐色都有。

木桶對威士忌最終香味影響大，例如波本威士忌通常有香草味，就係因為木桶嘅木質素會產生香草醛。而大約十年後，當木桶嘅內酯滲透酒體，威士忌就會散發出動人嘅椰香。

為咗增加威士忌香味，蒸餾廠仲會將木桶出租比西班牙酒窖，先裝雪莉酒，再用嚟熟成威士忌，呢招認真聰明。